سياسة الخصوصية
آخر تحديث: 31 تشرين الأول 2026 (أضفنا التحليل الأولي الآلي)
قِوام مساعد ذكاء اصطناعي تعليمي بعلوم الحركة والتدريب الرياضي والإصابات والعلاج الطبيعي. هالصفحة بتشرح شو بنجمع، وليش، وكيف بنحافظ عليه.
شو بنجمع
- بدون تسجيل دخول: محادثاتك بتنحفظ على جهازك ومتصفحك بس، وما بتنحفظ عنا.
- نص الأسئلة لحاله: بنحفظ نص كل سؤال بتسأله للمساعد، بدون اسمك أو حسابك أو عنوان جهازك أو باقي المحادثة، لمدة 30 يوم، وبعدها بينحذف لحاله. الهدف نعرف شو أكثر المواضيع اللي بتهم الناس ونعمل محتوى عنها. فلا تكتب بسؤالك اسمك أو أي معلومة بتعرّف عنك.
- إذا عملت حساب باسم مستخدم: اسم المستخدم، والاسم اللي بتكتبه (اختياري)، وكلمة السر مشفّرة (ما حدا بيقدر يقرأها، ولا حتى نحن).
- إذا سجّلت بحساب Google: بناخد من Google بس اسمك وإيميلك ورقم تعريف الحساب، حتى نعرفك لما ترجع. ما بنوصل لأي شي تاني بحسابك.
- المحادثات: إذا كنت مسجّل دخول، محادثاتك بتنحفظ بحسابك حتى تشوفها على كل أجهزتك.
- التقييم (👍/👎): إذا قيّمت جواب، بنحفظ التقييم ومقطع قصير من السؤال والجواب حتى نحسّن المساعد.
الصور والتسجيلات الصوتية
- الصور اللي بترفعها بتنبعت للمساعد حتى يحلّلها، وما بنحفظها عنا. ما بتنحفظ مع محادثتك، ولا حتى إذا كنت مسجّل دخول.
- التسجيل الصوتي بنحوّله لنص، وبعدها بينحذف فوراً. بتشوف النص بخانة الكتابة وبتقدر تعدّله قبل ما تبعته.
- ما بنستخدم صورك ولا صوتك لأي إشي غير إنه المساعد يجاوبك على سؤالك.
كوتش قِوام (الخدمة المدفوعة)
- الاستبيان الصحي: إذا طلبت خدمة من الكوتش، بنحفظ إجاباتك (الهدف، الخبرة، الأيام، المعدات، الإصابات) وإجاباتك على أسئلة الفحص الصحي PAR-Q بحسابك. هاي بيانات صحية حساسة، وما بيشوفها إلا إنت والكوتش عبد الملك، وما بتنستخدم إلا لتصميم تدريبك بشكل آمن.
- الفيديوهات: الفيديو اللي بترفعه بينحفظ بتخزين خاص على Cloudflare، ورابطه خاص ومش عام. ما بيشوفه إلا إنت والكوتش. بينحذف تلقائياً بعد 30 يوم من رد الكوتش عليه.
- الدفع: بنحفظ طريقة الدفع (مثل CliQ) ورقم العملية أو صورة الإيصال اللي بترفعها، حتى نتأكد من الدفعة. ما بنشوف ولا بنحفظ أي معلومات بنكية أو بطاقات.
- التحليل الأولي الآلي: الفيديو اللي بترفعه للكوتش، والتشيك إن الأسبوعي، بيحللهم مزوّد ذكاء اصطناعي (Google Gemini) قبل ما يراجعهم الكوتش، عشان توصلك ملاحظات أولية بسرعة. منحذف الفيديو من ملفات Gemini أول ما يخلص التحليل، والكوتش بيراجع كل إشي قبل ما يرد عليك باسمه.
- مهم: بنستخدم Gemini على خطته المجانية. حسب شروط Google لهالخطة، Google ممكن تستخدم المحتوى اللي بينبعتلها (الفيديو والنص) لتحسين خدماتها ونماذجها، وممكن يراجعه موظفين عندها. فـلا ترفع فيديو بيبيّن وجهك إذا ما في داعي (صوّر الجسم من الرقبة ونازل إذا بتقدر)، ولا تكتب بالتشيك إن اسمك الكامل أو أي معلومة بتعرّف عنك.
- ردود الكوتش: الردود المكتوبة والصوتية بتنحفظ بحسابك لتقدر ترجعلها.
- لحذف طلباتك وبياناتك الصحية، راسلنا على abdalmlkbdalal@gmail.com.
مين بيعالج رسائلك
حتى يجاوبك المساعد، أسئلتك والصور اللي بترفعها والتسجيلات الصوتية (لتحويلها لنص) بتنبعت لمزوّدي نماذج الذكاء الاصطناعي: Google Gemini، وCloudflare Workers AI، وGroq، وOpenRouter. الموقع نفسه شغّال على Cloudflare. كل مزوّد إله سياسة خصوصية خاصة فيه. لا تكتب معلومات شخصية حساسة متل رقمك الوطني أو تفاصيل تقاريرك الطبية الكاملة.
شو ما بنعمله
- ما بنبيع بياناتك ولا بنشاركها مع حدا للإعلانات.
- ما بنستخدم بيانات Google إلا لتسجيل دخولك.
كيف بتحذف بياناتك
- بتقدر تحذف أي محادثة من قائمة "المحادثات" بالموقع.
- تسجيل الخروج بيمسح المحادثات من جهازك.
- لحذف حسابك كامل، راسلنا على abdalmlkbdalal@gmail.com وبنحذفه خلال 30 يوم.
إذا عمرك صغير
إذا عمرك أقل من 16 سنة، استخدم الموقع بمعرفة أهلك، وما بتقدر تعمل حساب أو تطلب خدمة مدفوعة بدون موافقتهم.
تنبيه
قِوام للتعليم بس، ومش بديل عن تشخيص طبيب أو أخصائي علاج طبيعي. بالألم الشديد أو التنميل أو التورّم الكبير، راجع مختص.
من نحن · شروط الاستخدام: اقرأها هون.